This post is also available in:
English
Apple က သူတို့ရဲ့ ပထမဆုံး Processor ကို စတင်မိတ်ဆက်ခဲ့ပြီး M1 လို့ နာမည်ပေးထားပါတယ်။ M1 chip ဟာ Mac device တွေအတွက် အဓိက ရည်ရွယ်ထုတ်လုပ်ထားခြင်းဖြစ်ပါတယ်။ M1 ဟာ အရွယ်အစားသေးငယ်ပြီး စွမ်းအင်သုံးစွဲမှု နည်းတာကြောင့် Mac စနစ်တွေမှာ အလွန် အသုံးဝင်မှာ ဖြစ်ပါတယ်။
Apple အနေနဲ့ Intel Processors သုံးစွဲနေမှုကို ရပ်တန့်ပြီး ကိုယ်တိုင်ထုတ်လုပ်တဲ့ Processor တွေကို စတင်သုံးစွဲဖို့ စီစဉ်နေတယ်လို့ WWDC ပွဲမှာ ပြောခဲ့ပါတယ်။ Apple ဟာ Intel Processors တွေကို ၂၀၀၆ ခုနှစ်ကတည်းက စတင် သုံးစွဲခဲ့ပြီး အခုအခါမှာတော့ M1 chip ကို ထုတ်လုပ်နိုင်ခဲ့ပါပြီ။ M1 chip ကြောင့် Apple အနေနဲ့ Mac device တွေနဲ့ MacOS ရဲ့ စွမ်းဆောင်ရည်အပေါ် အပြည့်အဝ ထိန်းချုပ်နိုင်တော့မှာ ဖြစ်တယ်လို့ ဆိုပါတယ်။ နောက်ထွက်ရှိလာမယ့် MacOS Big Sur ဟာလည်း M1 chip အတွက် ပိုမိုသင့်တော်အောင် ဖန်တီးထားတယ်လို့ ဆိုပါတယ်။ ဒါကြောင့် Mac device တွေအနေနဲ့ ပါဝါသုံးစွဲမှု အနည်းဆုံးနဲ့ စွမ်းဆောင်ရည် အမြင့်ဆုံးကို ရဖို့ မျှော်လင့်နိုင်ပါပြီ။
CPU စွမ်းဆောင်ရည်
M1 မှာ CPU core 8 လုံး ပါဝင်ပြီး ၄ လုံးဟာ စွမ်းဆောင်ရည် မြင့်မားဖို့နဲ့ အခြား ၄ လုံးကိုတော့ စွမ်းအင်သုံးစွဲမှုအနည်းဆုံးနဲ့ ထိရောက်တဲ့ ရလဒ်တွေ ရရှိဖို့ ရည်ရွယ်ပါတယ်။ စွမ်းအင်သုံးစွဲမှု ဆယ်ပုံ တစ်ပုံနဲ့ စွမ်းဆောင်ရည် မြင့်မြင့် ရရှိနိုင်မယ်လို့ Apple က ဆိုပါတယ်။ တကယ်တော့ high-effiency cores တွေဟာ သူတို့ချည်းပဲကို အစွမ်းထက်နေပါပြီ။ core တစ်ခုဟာ Intel ရဲ့ dual core ကို အသုံးပြုတဲ့ Macbook Air တွေလောက် စွမ်းဆောင်ရည် ရရှိနိုင်မှာဖြစ်ပြီး ပါဝါသုံးစွဲမှုမှာတော့ ပိုနည်းမှာ ဖြစ်ပါတယ်။ ဒါ့အပြင် core ၈ ခုစလုံးဟာ ပေါင်းစပ်အလုပ်လုပ်တဲ့အခါမှာ မယုံကြည်နိုင်လောက်တဲ့ တွက်ချက်စွမ်းရည်ကို ရရှိနိုင်မှာ ဖြစ်ပြီး ကမ္ဘာ့စွမ်းဆောင်ရည်အမြင့်ဆုံး CPU စွမ်းရည်မျိုး ဖြစ်လာမယ်လို့ Apple က ဆိုပါတယ်။
GPU စွမ်းဆောင်ရည်
CPU လိုပဲ GPU ဟာလည်း core ၈ လုံး ပါဝင်မှာ ဖြစ်ပြီး လုပ်ငန်းပေါင်း နှစ်သောင်းခွဲလောက်ကို တပြိုင်တည်း လုပ်ဆောင်နိုင်မှာ ဖြစ်ပါတယ်။ ဒါ့အပြင် GPU ဟာ 4K video streaming တွေကို ကြည်ကြည်လင်လင် ကြည့်နိုင်ဖို့နဲ့ 3D လုပ်ငန်းတွေ render လုပ်ဆောင်ရာမှာလည်း ကောင်းမွန်စွာ ကူညီပေးနိုင်မယ်လို့ Apple က ပြောပါတယ်။ Apple က M1 ဟာ တကိုယ်ရည်သုံးကွန်ပျူတာတွေထဲမှာ ကမ္ဘာ့အမြန်ဆုံး ကွန်ပျူတာဂရပ်ဖစ် ဖြစ်တယ်လို့ ကြေညာထားပါတယ်။
Neural Engine
M1 chip မှာ Apple ရဲ့ Neural Engine ကို ထည့်သွင်းထားပြီး Neural Engine ဟာ Machine Learning လုပ်ငန်းတွေကို စွမ်းဆောင်ရည် မြှင့်တင်ပေးမှာ ဖြစ်ပါတယ်။ Neural Engine မှာ Apple ရဲ့ 16-core ဖွဲ့စည်မှု ပါရှိပြီး တစက္ကန့်အတွင်း လုပ်ငန်းပေါင်း ၁၁ ထရီလီယံကို လုပ်ဆောင်နိုင်မှာ ဖြစ်ပါတယ်။ Neural Engine ဟာ Apple ရဲ့ Machine Learning ကို ၁၅ ဆလောက် ပိုမြန်စေမယ်လို့ ဆိုပါတယ်။ ဘယ်လို Machine Learning လုပ်ငန်းတွေ ဖြစ်မလဲ။ Video သုံးသပ်မှုတွေ၊အသံ မှတ်မိနိုင်စွမ်းတွေနဲ့ ပုံရိပ် စစ်ဆေးခြင်းတွေမှာ အရင် Mac တွေနဲ့ မတူတဲ့ နောက်ထပ် အဆင့်တခုကို ရရှိနိုင်မှာ ဖြစ်ပါတယ်။
Copy this code to get iMovies Points.
