မတ်လ (၂၄) ရက် နံနက် (၆း၃၀) နာရီဝန်းကျင်တွင် အကြမ်းဖက် စစ်ကောင်စီတပ် ခမရ – ၃၅၅ သင်္ကန်းညီနောင်တပ်ရင်းမှ ထီးမူးထရွာအတွင်း လူနေအိမ်များဘက်သို့ လက်နက်ကြီးများဖြင့် ရည်ရွယ်ချက်ရှိရှိ ပစ်ခတ်ခဲ့သောကြောင့် အသက် (၁၇) နှစ်အရွယ် အမျိုးသမီးငယ်တစ်ဦး သေဆုံးသွားကြောင်း သိရှိရသည်။
ကရင်အမျိုးသားအစည်းအရုံး(KNU) ဒူးပလာယာခရိုင်၊ ကော့ကရိတ်မြို့နယ် အာရှလမ်းမရှိ မူးလာ့ချောင်း တံတားအနီးတွင် အကြမ်းဖက် စစ်ကောင်စီတပ် ခမရ (၃၅၅) နှင့် KNLA တပ်မဟာ လုံခြုံရေးစစ်ကြောင်းတို့ ယနေ့ မတ်လ (၂၄) ရက်နေ့ နံနက် (၅း၄၅) နာရီခန့်တွင် မိနစ်အနည်းငယ်ကြာ ပစ်ခတ်မှု ဖြစ်ပွားခဲ့ကြောင်း သိရှိရသည်။
တိုက်ပွဲအပြီး နံနက် (၆း၃၀) နာရီဝန်းကျင်တွင် အကြမ်းဖက် စစ်ကောင်စီတပ် (ခမရ – ၃၅၅) သင်္ကန်းညီနောင်တပ်ရပ်မှ ထီးမူးထရွာ လူနေအိမ်များဘက်သို့ လက်နက်ကြီးများဖြင့် အချက် (၂၀) ကျော် ရည်ရွယ်ချက်ရှိရှိ ပစ်ခတ်ခဲ့ကြောင်း သိရှိရသည်။ အဆိုပါ ပစ်ခတ်မှုကြောင့် ထီးမူးထကျေးရွာမှ ၁၇ နှစ်အရွယ် အမျိုးသမီးတစ်ဦး အသက်ဆုံးရှုံးခဲ့ရပြီး ဒေသခံ (၃) ဦး ထိခိုက်ဒဏ်ရာရရှိခဲ့ကြောင်း KNU – ဒူးပလာယာခရိုင်က သတင်းထုတ်ပြန်ထားသည်။
ထိခိုက်ဒဏ်ရာရရှိသူများမှာ စောဖါးနူဝါး အသက် (၄၄) နှစ်၊ နော်မု့လားပို့ အသက် (၄၀)နှစ်နှင့် နော်မုလုခေး အသက် (၃၃) နှစ်တို့ဖြစ်သည်။
ထို့အပြင် လူနေအိမ် (၃)လုံးနှင့် ကား (၁)စီး လက်နက်ကြီးထိမှန်ကာ ပျက်စီးမှုများလည်း ရှိသည်။
