အာဏာသိမ်းစစ်ကောင်စီ၏ လက်ပါးစေများက မန္တလေးတိုင်း မိုးကုတ်မြို့တွင် ဒီမိုကရေစီ အရေးတောင်းဆိုနေသည့် တစ်ဦးအား ဖမ်းမရသေးသည့်အတွက် ၎င်း၏ဇနီးဖြစ်သူနှင့် သမီးဖြစ်သူ လေး နှစ်အရွယ် သမီးကို ဇွန်လ ၁၃ ရက်က ဖမ်းဆီးသွားခဲ့သည်။
ယနေ့ ဇွန်လ ၂၈ ရက်သည် စစ်ကောင်စီမှ မတရားဖမ်းဆီးထားသည့် ကလေးငယ်၏ ငါးနှစ်ပြည့်မွေးနေ့ဖြစ်ကြောင်း သိရသည်။ လေးနှစ်အရွယ်ကလေးငယ်မှာ မိခင်ဖြစ်သူနှင့်အတူ ရက်သတ္တပတ် နှစ်ပတ်ကျော်ကြာ ထိန်းသိမ်းခြင်းခံထားရဆဲဖြစ်သည်။
“အကျဉ်းစံ အချုပ်ထဲက ‘စုထက်ဝိုင်း’ သမီးလေး.ဒီနေ့ (28.7.2021) ငါးနှစ်ပြည့်တဲ့နေ့.၊ မွေးနေ့မှစပြီး အမှန်တရားမြတ်နိုးသူအဖြစ် လောကကိုကောင်းကျိုးပြုနိုင်ပါစေ။ အရေးတော်ပုံ အောင်ရမည်.” ဟု တိမ်းရှောင်နေရသည့် ဖခင်ဖြစ်သူ ကိုစိုးဌေးက သူ၏ လူမှုကွန်ယက်မှ တဆင့် ဆုတောင်းပေးထားသည်ကိုတွေ့ရသည်။
ပြီးခဲ့သည့် ဇွန်လ ၁၃ ရက် ညနေပိုင်းက မိုးကုတ်မြို့မှ ကိုစိုးဌေးဆိုသူ၏နေအိမ်သို့ စစ်ကောင်စီက ဝရမ်းလာရောက်ကပ်ခဲ့ပြီးနောက် ၎င်းကိုမတွေ့သည့်အတွက် ဇနီးနှင့် သမီးကို ဖမ်းဆီးခဲ့ခြင်းဖြစ်သည်။
ကိုစိုးဌေးကို မိုးကုတ်မြို့တွင် အာဏာသိမ်းစစ်တပ်အား ကန့်ကွက်ဆန္ဒပြပွဲများတွင် ပါဝင်သောကြောင့်ဟုဆိုကာ မတရားပုဒ်မများတပ်ပြီး တရားစွဲဆိုထားကြောင်း ဒေသခံများကပြောသည်။မိုးကုတ်မြို့တွင် ပြီးခဲ့သော လပိုင်းများအတွင်းကလည်း CDM လုပ်နေသည့် ကျောင်းဆရာမတဦးအား ဖမ်းဆီးမရသည့်အတွက် အမေဖြစ်သူနဲ့ အကိုဖြစ်သူအား ဓားစာခံအဖြစ်ဖမ်းဆီးခေါ်ဆောင်ခြင်းများလည်းပြုလုပ်ခဲ့သည်။
