Google Photos က နောက်နှစ် ၂၀၂၁ ခုနှစ် ဇွန်လ ၁ ရက်နေ့က စပြီး unlimited storage ပေးခြင်းကို ရပ်ဆိုင်းတော့မှာ ဖြစ်ပါတယ်။ အသုံးပြုသူတွေအနေနဲ့ Gmail အကောင့်ဖွင့်စဉ်က ရရှိတဲ့ ၁၅ ဂစ်ကိုသာ ရရှိတော့မှာ ဖြစ်ပြီး အဆိုပါ ၁၅ ဂစ်ကိုသာ Google Photos အနေနဲ့ မျှဝေသုံးစွဲရမှာ ဖြစ်ပါတယ်။
ဇွန်လ ၁ ရက်နေ့မတိုင်ခင် upload ပြုလုပ်ထားတဲ့ storage ကိုတော့ ထည့်သွင်းတွက်ချက်မှာ မဟုတ်ပါဘူး။ ဆိုလိုတာက ဇွန်လ ၁ ရက်နေ့ မတိုင်ခင် တင်ထားတဲ့ ဓါတ်ပုံတွေအပြင်ကို 15GB သက်သက် ရရှိမှာ ဖြစ်ပါတယ်။
ဂူးဂဲအနေနဲ့ high quality ဓါတ်ပုံများအတွက် အကန့်အသတ်မဲ့ ဖိုင်သိမ်းဆည်းမှုကို ၅ နှစ်ကြာ အခမဲ့ ဝန်ဆောင်မှုပေးခဲ့တာဖြစ်ပြီး အခုအခါမှာတော့ အခမဲ့ပေးခြင်းကို ရပ်ဆိုင်းတော့မှာ ဖြစ်ပါတယ်။ ၁၅ ဂစ်ထက် ပိုသုံးတဲ့ အကောင့်တွေအတွက် အခကြေးငွေ စတင်ကောက်ခံတော့မှာ ဖြစ်ပါတယ်။
Google Photos အပြင် Google ရဲ့ ဝန်ဆောင်မှုတွေ ဖြစ်တဲ့ Google Docs, Sheets, Slides အစရှိတဲ့ ဝန်ဆောင်မှုတွေအတွက်လည်း Google Drive ရဲ့ ၁၅ ဂစ် ကိုသာ မျှဝေသုံးစွဲရမှာလည်း ဖြစ်ပါတယ်။ ဒါ့အပြင် အနည်းဆုံး နှစ်နှစ်အထိ အသုံးမပြုတော့တဲ့ အကောင့်တွေရဲ့ ဒေတာတွေကိုလည်း ဖျက်ပစ်မှာ ဖြစ်ပါတယ်။
ဘာပဲဖြစ်ဖြစ် Google Drive ရဲ့ အခမဲ့ ၁၅ ဂစ်ဟာ အခြားသော ပြိုင်ဘက်တွေထက် ပိုများနေသေးတာ ဖြစ်ပါတယ်။ Apple က icloud ကို 5GB အထိသာ အခမဲ့ပေးထားတာ ဖြစ်ပါတယ်။ ဒါ့အပြင် Google Photos အသုံးပြုသူတွေရဲ့ ၈၀ ရာခိုင်နှုန်းဟာ နောက်သုံးနှစ်အထိ 15 GB limit ကို မရောက်နိုင်ဘူးလို့ ခန့်မှန်းထားပါတယ်။
ဒီ ဖိုင်အကန့်အသတ် ပြောင်းလဲမှုဟာ Google Pixel ဖုန်းတွေကလွဲပြီး ဖုန်းအားလုံးအတွက် အကျုံးဝင်မှာ ဖြစ်ပါတယ်။ Google Pixel 1-5 ကတော့ ပုံမှန်အတိုင်း unlimited storage က ဆက်လက် ရရှိနေဦးမှာ ဖြစ်ပါတယ်။
