သတင်းတု/မှားတွေကို ဖြန့်ဝေနေကြတဲ့ ပုံစံတွေထဲမှာ အရင်က ဖြစ်ပျက်ခဲ့တဲ့ အဖြစ်အပျက်က သတင်းနဲ့ ဓါတ်ပုံတွေကို အချိန်ကာလ မဖော်ပြပဲ ပြန်လည်ဖြန့်ဝေတာမျိုးနဲ့ အချိန်တွေကို လိုသလို ပြင်ပြီး ပြန်လည်ဖြန့်ဝေနေတာမျိုးတွေ လုပ်ကြပါတယ်။
အခုဆိုရင်လည်း လှိုင်သာယာ၊ ကယားပြည်နယ် စတဲ့ ဒေသတွေမှာဖြစ်ခဲ့တဲ့ စစ်ကောင်စီက ဆန္ဒပြတဲ့ ပြည်သူတွေကို အကြမ်းဖက်နှိမ်နှင်းတဲ့ ရုပ်သံဖိုင်တွေကို အခုပဲ ဖြစ်ပွားနေသယောင် ဖြန့်ဝေလာကြပါတယ်။
ဒီ ရုပ်သံဖိုင်တွေမှာဆိုရင် တိုက်ရိုက်တင်ဆက်မှု Live လွှင့်နေသယောင်၊ ယခုဖြစ်စဥ်တစ်ခုကို တိုက်ရိုက်လွှင့်တင်နေသယောင် ပုံဖော်ကြပါတယ်။ အခုဖြစ်ပျက်နေတဲ့ ဖြစ်စဉ်တစ်ခုလို ပုံဖော်ထားတဲ့အတွက် လူအများရဲ့ စိတ်ဝင်စားမှုကိုလည်း အလွယ်တကူပဲ ရရှိနိုင်ပြီး ကြည့်ရှုသူတွေဟာဆိုရင် သောင်းဂဏန်း (11 K) အထိ ရှိပါတယ်။ live အစစ်ထင်ပြီး ပြန်လည်မျှဝေနေတဲ့ သူတွေလဲ ရှိနေတာကြောင့် အလွယ်တကူပဲ Like နဲ့ share ဟာ အချိန်တိုအတွင်းပဲ သိသိသာသာ မြင့်တတ်လာပါတယ်။ တိုက်ရိုက်တင်ဆက်မှုယောင်ဆောင်ထားတဲ့ ရုပ်သံဖိုင်တွေဟာ နာရီများစွာကြာမြင့်ပြီးမှ တင်ဆက်သူက ပြန်ဖျက်သွားကြပါတယ်။
အဆိုပါ Live အတုတွေကို We Love Myanmar ဆိုတဲ့ အဖွဲ့ဝင်ဦးရေ (၃၄၀၅၆) ရှိနေတဲ့ Facebook Group တစ်ခုမှာ လွင့်နေတာပဲဖြစ်ပါတယ်။ အဲ့ဒီ Group ဟာဆိုရင် April 4 ရက်နေ့ကမှ စဖွင့်ထားတာဖြစ်ပြီးတော့ Group ကို ထိန်းချုပ်ထားတဲ့ Admin Page တွေကပဲ live အတုကို လွင့်နေကြတာဖြစ်ပါတယ်။ Live အတု လွင့်နေတဲ့ Admin Page တွေကလဲ Page အသစ်တွေပဲ ဖြစ်နေပြန်ပါတယ်။
အခုလို ဖြစ်ပျက်ခဲ့ပြီးသား သတင်းတွေကို ပြန်လည်ဖြန့်ဝေမှုတွေ များပြားလာတဲ့အခါမှာ တကယ့်လက်တွေ့ မြေပြင်မှာ ဖြစ်ပျက်နေတဲ့ သတင်းတွေနေရာမှာ အစားထိုးနေရာယူလာကြပါတယ်။ နောက်ဆက်တွဲအဖြစ် မိမိရဲ့ ဖေ့ဘွတ်ခ်မှာ သတင်းအမှန်တွေက နောက်ကျသွားပြီး သတင်းဖောင်းပွမှုတွေ ဖြစ်ပေါ်စေနိုင်ပါတယ်။ ဒါအပြင် အရင်ကဖြစ်စဥ်ကို အခုပဲ ဖြစ်ပျက်နေသလို ပြန်လည်မျှဝေထားတာ ဖြစ်တဲ့အတွက် မလိုလားအပ်တဲ့ သတင်းအချက်အလက်အမှားတွေက ဆိုရှယ်မီဒီယာ သုံးစွဲသူတွေဆီကို ပြန့်နှံ့သွားပြန်ပါတယ်။
ဆိုရှယ်မီဒီယာ သုံးစွဲသူ သတင်းဖတ်ရှုသူတွေ အနေနဲ့လည်း အခုလို Live အတုတွေကို အချိန်ကုန်ခံပြီး မကြည့်ပဲ နဲ့ တခြား ကျန်တဲ့ သူတွေဆီကိုလဲ သတင်းမှားတွေ မရောက်အောင် ပြန်လည်မျှဝေတာမျိုး မလုပ်ပဲ live အတုမှန်း သိရှိတာနဲ့ Facebook ကို Report လုပ်ပေးကြဖို့ တိုက်တွန်း လိုက်ရပါတယ်။
