Visionox ကုမ္ပဏီဟာ တရုတ်နိုင်ငံမှာ OLED Display ကို အဓိက ထုတ်လုပ်နေတဲ့သူ ဖြစ်ပါတယ်။ Visionox ဟာ ကင်မရာကို အောက်မှာ မြုပ်ထည့်ထားတဲ့ ဖုန်းမျက်နှာပြင် (under-screen cameras) တွေကို အမြောက်အမြား ထုတ်လုပ်တော့မယ်လို့ ယူဆရပါတယ်။ အဆိုပါ ကုမ္ပဏီဟာ under-screen cameras တွေနဲ့ ပတ်သက်တဲ့ ပရိုမိုးရှင်း ဗီဒီယိုတစ်ခုကိုလည်း ဖြန့်ချီထားပါသေးတယ်။ တရုတ်နိုင်ငံအတွင်း သတင်းထုတ်ပြန်ချက်တွေအရ ဖောက်မြင်ရပြီး under-screen cameras ပါဝင်တဲ့ OLED display တွေကို အမြောက်အမြား ထုတ်လုပ် ဖြန့်ချီတော့မယ်လို့ ဆိုပါတယ်။
Under-Screen cameras တွေအတွက် အဓိက အရေးကြီးတဲ့အချက်က ဖုန်းရဲ့ မျက်နှာပြင်ဟာ ကြည်ကြည်လင်လင် ဖောက်မြင်နိုင်ဖို့ လိုအပ်ပြီး အလင်းမပြန်ဖို့လည်း ဂရုစိုက်ရမှာ ဖြစ်ပါတယ်။ ဒါမှသာ ကင်မရာရဲ့ အရည်အသွေးကို မထိခိုက်မှာ ဖြစ်ပါတယ်။ Visionox အနေနဲ့ Organic နဲ့ Inorganic ပစ္စည်းတွေကို အချိုးကျ ပေါင်းစပ်ပြီး ကင်မရာရဲ့ အရည်းအသွေးကို ကောင်းမွန်စေဖို့နဲ့ ဖုန်းမျက်နှာပြင်ရဲ့ အရည်အသွေးကို မထိခိုက်စေဖို့ လုပ်ဆောင်ထားတာပါ။
Visionox အနေနဲ့ ကင်မရာနဲ့ မျက်နှာပြင် နှစ်ခုလုံးရဲ့ အရည်အသွေးကို ထိန်းဖို့ အထူးပြုလုပ်ထားတဲ့ driver software ကို အသုံးပြုထားပြီး ကနဦးထွက်ရှိထားတဲ့ ပုံစံတွေရဲ့ အားနည်းချက်တွေဖြစ်တဲ့ အလင်းပြန်တာ၊ မှုန်ဝါးဝါးဖြစ်တာတွေကို ကာကွယ်ထားတယ်လို့ ဆိုပါတယ်။
ဒါကြောင့် အနာဂတ်မှာ ဖုန်းမျက်နှာပြင်အောက်မှာ မြုပ်နှံထားတဲ့ ကင်မရာတွေကြောင့် လက်ရှိ Notch တွေ ပျောက်ပြီး မျက်နှာပြင်အပြည့် ဖုန်းတွေ ပေါ်ပေါက်လာနိုင်ခြေ ရှိပါတယ်။ ဒီနည်းပညာဟာ အနာဂတ်မှာ ထွက်ရှိမယ့် ဖုန်းတွေအတွက် ဘယ်လိုပုံစံနဲ့ အသုံးချပြီး မိတ်ဆက်လာမလဲဆိုတာ ကျွန်တော်တို့ စောင့်ကြည့်ကြရမှာ ဖြစ်ပါတယ်။
