ဘဏ်မှာ ငွေထုတ်သင့်သလား – သူ့အတွေး သူ့အမြင်

ဘဏ်ကိစ္စ တတ်နိုင်သမျှ ဝင်မပြောခဲ့ပေမယ့် Victim Blaming လုပ်လာတာ မြင်ရပါ အရမ်းများလာလို့ပါ။ ပြည်သူတစ်ယောက်ဟာ သူရှာဖွေထားတဲ့၊ သူပိုင်ဆိုင်တဲ့ ငွေကို ဘဏ်မှာ သွင်းသည်ဖြစ်စေ၊ ထုတ်သည် ဖြစ်စေ ဒါဟာ သူ့ရဲ့ အခြေခံ လူ့အခွင့်အရေးပါ။

အဲဒီတော့ Cash Freeze က ဘယ်ကစလဲ? Mobile Data နဲ့ Wifi တွေ ပိတ်ချလိုက်ရာက စတယ်။ အဲဒီတော့ ဘယ်သူတွေက ဒီ အင်တာနက်ဆိုင်ရာ လူ့ အခွင့်အရေးကို ပိတ်ဆို့ခဲ့တာလဲ? ဘယ်သူ လုပ်ခဲ့တာလဲ? Cash Freeze ဖြစ်သွားတဲ့အခါ အသုံးအတွက် လိုလို့ ထုတ်တဲ့သူ ရှိမယ်၊ လုပ်ငန်း သဘောအရ ထုတ်ရတဲ့သူရှိမယ်၊ ပြီးတော့ ယုံကြည်မှု မရှိတော့လို့ ထုတ်ရတဲ့သူ ရှိမယ်။

အာဏာသိမ်း အစိုးရ ဟာ ဘဏ်စနစ်နဲ့ ဗဟိုဘဏ် ကို ယုံကြည်စိတ်ချရမှု အပြည့်အဝ အာမခံပေးနိုင်ပါသလား? ဒီမေးခွန်း ကို ဘယ်သူမှ မဖြေပေးနိုင်ဘူး။ ဘဏ်စာရင်း Account ဖွင့်ချိန်တုန်းက အခုလို ATM တွေက ထုတ်ရမယ်၊ တိုကင်ယူ ထုတ်ရမယ်၊ ထုတ်ငွေ ကန့်သတ်ခံရမယ် လို့ ဘဏ် တွေနဲ့ ကတိကဝတ် ပြုထားခဲ့မိလို့လား? အခု နေပူထဲ၊ မိုးရွာထဲ တန်းစီ နေရတာ လူ့အခွင့်အရေး ဆုံးရှုံးနေတာ၊ဒါတွေအားလုံးဟာ ဘယ်သူ့ ကြောင့် ဖြစ်လာတာလဲ? ဘယ်သူ့မှာ တာဝန်ရှိသလဲ? တကယ်တော့ အဖြေကရှင်းနေတာပါ။

အဲဒါကို ပြုလုပ်သူကို တိုက်ရိုက် အပြစ်မတင်ဘဲ၊ သူတို့ကို ဘယ်လို မျိုး အနိုင်ရသည်အထိ တော်လှန်မလဲ မပြောဘဲ ဘဏ်တွေ ဒီလို ဖြစ်ရတာ ပြည်သူတွေ ငွေတွေထုတ်လို့၊ Digital Money တွေ မသုံးလို့ ဆိုပြီး အပြစ်တင်ဟာ လုံးဝ မဖြစ်သင့်တဲ့ ကိစ္စပါ။ Digital Pay/ Banking App တွေပဲ whitelists နဲ့ ဖွင့်ပေးထားတာ သူတို့ အသက်ရှူချောင်ရုံ ဟ ပေးပြီး ကျန်တဲ့ လူ့အခွင့်အရေး အကုန်ပိတ်ထားဆဲပဲလေ။

မုဒိမ်းကျင့်ပါတယ် ဆိုမှ အနေအထိုင်၊ အဝတ်အစား မတတ်လို့လား? မေးသလိုမျိုးပေါ့။ ပြုသူရဲ့ ယုတ်မာမှု ကို အပြစ်မတင်ဘဲ ခံရသူ/ အားနည်းသူကို အပြစ်ထိုးချ တာမျိုးပေါ့။

နောက်တစ်ချက်က အဲဒီ ငွေထုတ်တဲ့ သူတွေကြောင့် ဘဏ်တွေမလည်လို့ SAC ဟာ အရှိုက်ထိပြီး ရှေ့မဆက်နိုင် ဖြစ်နေတာ။ Victim Blaming မလုပ်ကြပါနဲ့ … ။ နည်းနည်းလေးမှ ကိုယ့်ဘက် အထိခိုက် မခံနိုင်ရင် ဒီတော်လှန်ရေး ရှေ့ဆက်လို့ မရနိုင်ဘူး။