အမျိုးသားညီညွတ်ရေးအစိုးရ (NUG) က မြန်မာ့ပထမဆုံး ဒစ်ဂျစ်တယ်ပိုက်ဆံ – DMMK ကို မနေ့က စတင်မိတ်ဆက်လာပါတယ်။
DMMK (Digital Myanmar Kyat) ဟာ blockchain နည်းပညာပေါ်မှာ တည်ဆောက်ထားတာဖြစ်ပြီး တရားဝင် ငွေကြေးစနစ်နဲ့ ကျောထောက်နောက်ခံပြုထားတယ်လို့ သိရပါတယ်။ ဒါပေမယ့် DMMK ကို ကျောထောက်နောက်ခံပြုထားတဲ့ ငွေကြးကိုတော့ ထုတ်ဖော်ပြောဆိုထားခြင်း မရှိသေးပါဘူး။ တရားဝင်ငွေကြေးစနစ်တစ်ခုနဲ့ ကျောထောက်နောက်ခံပြုထားတာဖြစ်တဲ့အတွက် DMMK တစ်ကျပ်ကို မြန်မာငွေ တစ်ကျပ် တန်ကြေးရှိမှာ ဖြစ်ပါတယ်။
ဖတ်ရန်: Myanmar’s National Unity Government to sell its treasury bonds with USDT
DMMK ဟာ ဗဟိုဘဏ် ဒစ်ဂျစ်တယ်ငွေကြေးစနစ်အဖြစ် တည်ရှိမှာ ဖြစ်ပြီး NUGPay မိုဘိုင်းပိုက်ဆံအိတ် app ကနေတစ်ဆင့် အသုံးပြုနိုင်မှာ ဖြစ်ပါတယ်။ တရားဝင်အစိုးရက အသိအမှတ်ပြုထားတဲ့ တရားဝင်ငွေကြေးဖြစ်တဲ့အတွက် ပြည်သူတွေအနေနဲ့ MMK အပြင် DMMK ကိုပါ အသုံးပြုနိုင်မှာ ဖြစ်တယ်လို့ သိရပါတယ်။ DMMK ဟာ မြန်မာပြည်သူတွေရဲ့ လက်လီအားဖြင့် ရောင်းဝယ်ဖောက်ကားနိုင်ဖို့ ငွေကြေးလိုအပ်ချက်ကို ဖြည့်ဆည်းပေးနိုင်မှာ ဖြစ်ပါတယ်။
DMMK ကို ထုတ်ဝေနိုင်ခဲ့တဲ့အတွက် မြန်မာပြည်သူတွေဟာ လုံခြုံတဲ့ငွေပေးချေမှုနဲ့ ခေတ်မီတဲ့ ဘဏ္ဍာရေးဝန်ဆောင်မှုတွေကို အကုန်အကျသက်သာစွာနဲ့ အသုံးပြုနိုင်မှာ ဖြစ်တယ်လို့ NUG က ထုတ်ပြန်ထားပါတယ်။
DMMK ငွေကြေးစနစ်ဟာ စစ်ကောင်စီယန္တရားအောက်က လွတ်ကင်းပြီး လွတ်လပ်စွာ တည်ရှိမှု၊ အလွယ်တကူ ရနိုင်မှု၊ တီထွင်ဆန်းသစ်မှုနဲ့ လုံခြုံမှု တို့အပေါ် အခြေခံထားတယ်လို့ သိရပါတယ်။ ဒီမူဝါဒတွေကို လက်ရှိ ဖြစ်ပေါ်နေတဲ့ ငွေကြေးအကျပ်အတည်း၊ ကိုယ်ရေးအချက်အလက် လုံခြုံမှု၊ နည်းပညာအသုံးစားရိတ်နဲ့ စီးပွားရေးအခြေအနေတွေအပေါ် လေ့လာပြီး အကောင်အထည်ဖော်ဆောင်ရွက်ထားတယ်လို့ NUG က ထုတ်ပြန်ထားပါတယ်။
NUGPay မိုဘိုင်းအက်ပ်ကို Google Playstore နဲ့ Apple App Store တို့မှာ မကြာခင် ဒေါင်းလုဒ်ရယူ အသုံးပြုနိုင်မှာ ဖြစ်တယ်လို့ လည်း သိရပါတယ်။
