မနေ့ကဖြစ်ပွားခဲ့တဲ့ အင်းစိန်ထောင်တွင်းဆန္ဒပြမှုကြောင့် ကိုအေးအောင်၊ ကိုနိုင်ဇော်တို့နဲ့အတူ ရန်ကုန်တက္ကသိုလ်ကျောင်းသားများသမဂ္ဂ၊ ကျောင်းသားထုအခွင့်အရေးတာဝန်ခံ ကိုလေပြေစိုးမိုး အင်းစိန်ထောင်မှာ တိုက်ပိတ်ခံရတယ်လို့ သိရှိရကြောင်း ရန်ကုန်တက္ကသိုလ် ကျောင်းသားသမဂ္ဂ UYSC က သတင်းထုတ်ပြန်ထားပါတယ်။
အခြား ကျောင်းသားခေါင်းဆောင်တဦးဖြစ်သူ ကိုဆစ်နိုင်ကိုတော့ ဆေးရုံမှာလား တိုက်ပိတ်ထားတာလားဆိုတာ မသိရှိရသေးကြောင်းလည်း ထုတ်ပြန်ချက်မှာ ပါရှိပါတယ်။
ဇူလိုင် ၂၃ရက်မနက်ပိုင်း အင်းစိန်ထောင်တွင်း ဆန္ဒထုတ်မှုအပြီးမှာ ဆန္ဒပြခေါင်းဆောင်တွေက ထောင်ထဲမှာ ဖျားနာသူတွေများနေပြီး ဆေးဝါးကုသမှုမလုံလောက်တာ၊ ရာဇဝတ်အသေးအဖွဲအမှု တွေကို လွှတ်ပေးပြီး ပုဒ်မ ၅၀၅(က) တွေကို လွှတ်မပေးတာ၊ ထောင်ထဲမှာ စည်းကမ်းတင်းကျပ်မှုများလာတာ စတဲ့အချက်သုံးချက်ကို အမြန်ဆုံးဖြေလျှော့ပေးဖို့ တောင်းဆိုခဲ့ပါတယ်။
ထောင်တွင်း ဆန္ဒပြခေါင်းဆောင်များ တိုက်ပိတ်ခံထားရတယ်ဆိုတဲ့ သတင်းတွေ ထွက်ပေါ်နေပေမယ့် ရန်ကုန်တိုင်း၊ အကျဉ်းဦးစီးဌာန ညွှန်ကြားရေးမှူ ဦးဇော်ဇော်က သတင်းအမှားများ ဖြစ်ကြောင်း ငြင်းဆိုထားပါတယ်။
“အေးအေးဆေးဆေးပါ။ ဖြိုခွဲတယ်လို့ ရိုက်နှက်တယ်လို့ဆိုတာ သတင်းအမှားတွေပါ။ သတင်းတွေက အကုန်လုံးအမှားတွေ။ စစ်တပ်က ဝင်ဖြိုခွင်းတယ်ဆိုတာလည်း အမှားတွေပဲ။ အကျဉ်းသားတွေကိုရိုက်နှက်တယ်၊ တိုက်ပိတ်တယ်ဆိုတာလည်းအမှားတွေပဲ။ အကျဉ်းဦးစီးကဝန်ထမ်းတွေမပါပါဘူး။ ဝန်ထမ်းကတော့ ဘယ်လိုလုပ်ပါမှာလဲ။ မပါပါဘူး” လို့ အကျဉ်းဦးစီးဌာန ညွှန်ကြားရေးမှူး ဦးဇော်ဇော်က ပြောပါတယ်။
Copy this code to get iMovies Points.
