အာဏာသိမ်းမှုကို ဆန့်ကျင်သော မည်သည့်အဖွဲ့အစည်းနှင့်မဆို လက်တွဲ၍ အာဏာရှင်စနစ်ကို ဆန့်ကျင်တော်လှန်သွားမည်ဖြစ်ကြောင်း ကရင်အမျိုးသားအစည်းအရုံး KNU က ယနေ့ သဘောထားထုတ်ပြန်သည်။
စက်တာဘာလ ၃ ရက်နေ့ ရက်စွဲဖြင့် ထုတ်ပြန်လာသည့် သဘောထားကြေညာချက်တွင် အချက် သုံးချက် ပါဝင်ပြီး ပထမဆုံးအချက်အနေဖြင့် ဖက်ဒရယ်နှင့် ဒီမိုကရေစီနစ်ကို မြှင့်တင်ရန် ခိုင်မာသော ကတိကဝတ်နှင့် လိုက်နာဆောင်ရွက်မှုကို ဆက်လက် ထိန်းသိမ်းထားပြီး အာဏာသိမ်းမှုကို ဆန့်ကျင်သော မည်သည့်အဖွဲ့အစည်းနှင့်မဆို လက်တွဲ၍ အာဏာရှင်စနစ်အားလုံးကို ဆန့်ကျင်တော်လှန်သွားမည်ဖြစ်ကြောင်း ဖော်ပြထားသည်။
မြန်မာစစ်တပ်၏ ရက်စက်ကြမ်းကြုတ်မှုများမှ အကာအကွယ် ရယူလိုသည့် မည်သူကိုမဆို တတ်နိုင်သည့်ဘက်မှ ကူညီပံ့ပိုးပေးပြီး နှစ်ရှည်ဖြစ်ပွားခဲ့သည့် ပြည်တွင်းစစ်၏ မူလဇစ်မြစ်ကို ဖြေရှင်းရန်နှင့် စစ်မှန်သော ငြိမ်းချမ်းရေးနှင့် တိုင်းပြည် တည်ငြိမ်အေးချမ်းမှုကို ဆောင်ကြဉ်းရန် နောက်ထပ်ဖြေရှင်းရေးနည်းလမ်းသစ်များကို ဆက်လက် ရှာဖွေလုပ်ဆောင်သွားမည်ဖြစ် ကြောင်းကို ဒုတိယအချက်အနေဖြင့် ဖော်ပြထားသည်။
ပြည်သူလူထုများအနေဖြင့်လည်း လွတ်လပ်မှုနှင့် တရားမျှတမှုအတွက် မိမိတတ်နိုင်သည့်ဘက်က နည်းမှန် လမ်းမှန်ဖြင့် ကူညီထောက်ခံကြောင်း ထုတ်ဖော်ပြသပေးရန် တိုက်တွန်းကြောင်း တတိယအချက်အနေဖြင့် ကြေညာချက်တွင် ဖော်ပြထားသည်။
