This post is also available in:
English
မြန်မာ့နွေဦးတော်လှန်ရေးအတွက် တဖက်တလမ်းက အားဖြည့်တဲ့အနေနဲ့ အဆိုတော် ဟန်ထူးလွင် (ကျားပေါက်)ဟာ သူပိုင်ဆိုင်တဲ့ ukulele ပေါ်မှာ doodle art ဆွဲပြီး ပန်ဆယ်လိုကို လေလံတင်ပေးဖို့ အောက်တိုဘာလ ၁၆ ရက် (မနေ့) ကအကူအညီ တောင်းခဲ့ပါတယ်။ လေလံပိတ်သိမ်းချိန်မှာ စံချိန်တင် ဒေါ်လာ ၂၇၅၀၀ နဲ့ ပိတ်သိမ်းခဲ့ပြီး ကမ္ဘာ့ဈေးအကြီးဆုံး ukulele အဖြစ် မှတ်တမ်းဝင်ခဲ့ပြီ ဖြစ်ပါတယ်။
လေလံစျေးအမြင့်ဆုံးနဲ့ အောင်သွားတဲ့ Bro အတွက် Congratulations လုပ်ချင်ပါတယ်။ နိုင်ငံပေါ်မှာထားတဲ့စေတနာရော art ကိုတန်ဖိုးထားတဲ့အတွက်ရော ကျေးဇူးတင်ပါတယ်။ အဆင့်ဆင့် စျေးတိုးပေးပြီး အပြိုင် လေလံဆွဲပေးသူများအားလုံးကိုလဲကျေးဇူးပါ။ ကျနော့် လက်ရေးနဲ့ hand drawn postcard လေး individually ပို့ပေးဖို့စီစဉ်နေပါပြီ။
ဟန်ထူးလွင် (ကျားပေါက်)
လေလံကို အောက်တိုဘာ ၁၆ ရက် မနက် ၉ နာရီဝန်းကျင်တွင် စတင်ခဲ့ပြီး အောက်တိုဘာ ၁၇ ရက် ည ၉ နာရီမှာ ပိတ်သိမ်းခဲ့ပါတယ်။ လေလံရရှိငွေအားလုံးကို အမျိုးသားညီညွတ်ရေးအစိုးရထံ ပေးအပ်မယ်လို့လည်း သိရပါတယ်။ လေလံကြမ်းခင်းဈေးအဖြစ် ကန်ဒေါ်လာ ၁၀၀၀ စတင် သတ်မှတ်ခဲ့ပြီး စတင် လေလံတင်ချိန်မှာပဲ ကန်ဒေါ်လာ ၂၀၀၀ နဲ့ စဖွင့်ခဲ့ပါတယ်။ လေလံတင်ပြီး တစ်နာရီအတွင်းမှာပဲ ကန်ဒေါ်လာ ၅၀၀၀ အထိ တိုးမြင့်လာပြီး အပြိုင်အဆိုင် ဖြစ်လာခဲ့ပါတယ်။
အောက်တိုဘာ ၁၆ ရက် နေ့လည် ၁ နာရီဝန်းကျင်မှာ လေလံတန်ဖိုး ဒေါ်လာ ၇၇၇၇ အထိ ဖြစ်လာခဲ့ပြီး ည ၉ နာရီ ဝန်းကျင်မှာတော့ ဒေါ်လာ ၈၈၈၈ အထိ တိုးမြှင့်ပေးလာကြပါတယ်။ အောက်တိုဘာ ၁၆ ရက် ည ၁၀ နာရီမှာတော့ ဒေါ်လာ ၁၀၀၀၀ အထိ ဖြစ်လာပြီး အပြိုင်အဆိုင် ဖြစ်လာပါတယ်။
နောက်တစ်ရက် အောက်တိုဘာ ၁၇ ရက် နေ့လည်မှာ ကန်ဒေါ်လာ ၁၁၁၁၁ (မြန်မာငွေ သိန်း ၂၀၀ ကျော်) အထိ ဖြစ်လာပြီး တစ်ဆက်တည်းမှာပဲ ဒေါ်လာ ၁၂၂၂၂၊ ဒေါ်လာ ၁၃၆၈၈၊ ဒေါ်လာ ၁၄၀၀၀ မှသည် ဒေါ်လာ ၁၅၀၀၀ အထိ ဖြစ်လာပါတယ်။
လေလံပိတ်သိမ်းရန် ၂ နာရီဝန်းကျင်အလိုမှာတော့ ဒေါ်လာ ၁၆၀၀၀၊ ၁ နာရီခွဲအလိုမှာ ဒေါ်လာ ၁၇၀၀၀၊ ၁ နာရီအလိုမှာ ဒေါ်လာ ၁၈၀၀၀၊ ၃၆ မိနစ် အလိုမှာ ဒေါ်လာ ၁၉၀၀၀၊ ၂၅ မိနစ် အလိုမှာ ဒေါ်လာ ၂၀၀၀၀ အထိ ဖြစ်လာပါတယ်။
လေလံပိတ်ရန် ၁၇ မိနစ်အလိုမှာ ဒေါ်လာ ၂၁၂၂၂ ဖြစ်လာပြီး ဆယ်မိနစ်အလိုမှာ ဒေါ်လာ ၂၂၂၂၂ အထိ ဖြစ်လာပါတယ်။ နောက်ဆုံး လေလံပိတ်သိမ်းချိန်မှာတော့ ကမ္ဘာ့စံချိန်တင်ဈေးနှုန်း ဒေါ်လာ ၂၇၅၀၀ နဲ့ ပိတ်သိမ်းခဲ့ပြီး ကမ္ဘာ့ဈေးအကြီးဆုံး ukulele အဖြစ် မှတ်တမ်းဝင်ခဲ့ပြီ ဖြစ်ပါတယ်။
ယခင်က ကမ္ဘာ့ဈေးအကြီးဆုံး ukulele ဟာ John D’Angelico ဆိုသူ ဖန်တီးခဲ့တာဖြစ်ပြီး ebay မှာ ဒေါ်လာ ၂၆၀၀၀ နဲ့ ရောင်းထွက်ထားတာ ဖြစ်ပါတယ်။
