ရန်ကုန်က လူနာများအတွက် အောက်စီဂျင်ပြတ်တောက်မှုက ကြီးမားနေဆဲဖြစ်သည်။ရေဝေးသုသာန်သို့ ရုပ်အလောင်း ၃၀၀ နှင့် ၄၀၀ ကြား နေ့စဉ်ရောက်လာနေသည်မှာ လေးရက်ရှိပြီဖြစ်သည်။ ထိုအထဲမှာ အများစုတွင် အောက်စီဂျင်ပြတ်လပ်၍ သေဆုံးခဲ့ခြင်းဖြစ်သည်ဟု နာရေးကူညီပေးနေသော ပရဟိတကူညီရေးအသင်းများက ပြောသည်။
သုသာန်သို့ရောက်လာသော ကိုယ်ဝန်လေးလလွယ်ထားသည့် အမျိုးသမီးရုပ်အလောင်းတစ်ခု၏ ဆွေမျိုးသားချင်းတစ်ဦးက “ အောက်စီဂျင်ရှုနေတာ သုံးရက်လောက်ရှိပြီ။ မနက်က အောက်စီဂျင်ပြတ်ပြီး ဖြစ်တာ။ သုံးနာရီလောက်တည်းက အောက်စီဂျင်မရတာ။ ဆုံးတာမနက် ၉ နာရီလောက်က ဆုံးတယ် ” ဟု မျက်ရည်များဝဲလျက် ပြောသည်။
ရေဝေးသို့ နာရေးလာပို့ကြသော ကားများတွင် ပရဟိတအဖွဲ့များ၏ကားက အများဆုံးဖြစ်ကြပြီး အဖွဲ့ပေါင်း ၄၀ ခန့်ထိ ရှိနေသည်။ ကား ၁၀ စီးဖြင့် နာရေးကူညီဆောင်ရွက်ပေးနေသော လူမှုထောက်ကူပြုပရဟိတအသင်းမှ တာဝန်ရှိသူတစ်ဦးက “ လေးရက်အတွင်း အောင်စီဂျင်ပြတ်လို့ သေဆုံးသူက ၂၀ လောက်ထိ ရှိသွားပြီ။ ဒါက ကျွန်တော်တို့အသင်းတစ်ခုပဲနော် ” ဟု ဆိုသည်။
ကျွန်တော်တို့ ပို့ရတဲ့ သေဆုံးသူတွေထဲမှာ အများဆုံးက အောင်စီဂျင်ပြတ်ပြီး သေတဲ့သူတွေ များကြတယ်
မြန်မာနိုင်ငံလူမှုရေးအသင်း(ဗဟန်း)၏ စေတနာ့ဝန်ထမ်းတစ်ဦးက
အနှိုင်းမဲ့မေတ္တာလူမှုကူညီရေးအသင်းသားတစ်ဦးက “ တစ်ရက်ကို ခုနှစ်ယောက်လောက် အောက်စီဂျင်ပြတ်ပြီး သေနေတယ်။ ၂၀ ပို့တာ အဲ့အထဲမှာ ၁၅ ယောက်လောက်က အောက်စီဂျင်ပြတ်ပြီး သေနေကြတာ။ ” ဟု ပြောသည်။
ရန်ကုန်မြို့က အောက်စီဂျင်ဖြည့်ပေးနေသောနေရာများတွင် စစ်ကောင်စီလက်အောက်ခံ စစ်ဆေးရုံများက လာရောက်သယ်ယူနေကြသော်လည်း လူမှုကူညီရေးပရဟိတအဖွဲ့များအတွက်တော့ ခက်ခဲစွာ ရှာဖွေနေရကြောင်း စေတနာ့ဝန်ထမ်းများက ငြီးတွားကြသည်။
